أجي تتعرف على مختلف وحدات لشرطة المغربية

أجي تتعرف على مختلف وحدات لشرطة المغربية

أجي تتعرف على مختلف وحدات لشرطة المغربية
الشرطة المغربية أو الأمن الوطني هو الجهاز الأول المسؤول عن الأمن في المغرب
هاذ الجهاز كيتكون من عدة وحدات بحيث كنلقاو

الشرطة القضائية

اللي كتتمحور المهام الأساسية ديالها فاستقبال شكايات المواطنين اللي كيتعرضو للإعتداءات أو السرقات أو غيرها من الجرائم.

شرطة المرور

كتكون هاذ الوحدة من رجال الشرطة اللي كيوقفو فالمدارات بالمدن واللي كينظمو حركة السير والجولان، وكنلقاو كذلك رجال شرطة اللي كيقودو الدراجات النارية الكبيرة الحجم، وكيجوبو الشوارع بحثا على السيارات المخالفة للقانون، وف 2014 تم إحداث فرقة ديال الدراجين خاصة بالشرطيات، بالإضافة لفرق خاصة بعملية حذر اللي تنشآت ف 2015.

مكافحة المخدرات:

هاذ الوحدة تابعة للشرطة القضائية ومختصة فمحافحة ترويج المخدرات (الشيرا، الكيف، أوراق التبغ...)، وكذلك الحد من الإتجار فالأقراص المهلوسة (القرقوبي) والكوكايين والهروين والسجائر المهربة، كما كتقوم هاد الوحدة بمداهمة مقاهي الشيشة كتعمل على إيقافها.

الشرطة التقنية والعلمية

هاذ الوحدة مختصة فرفع البصمات وأخد الصور ومسح مسرح الجريمة باش تجبد الأدلة اللي غتفيد وحدة الشرطة القضائية فالتحقيق، العمل ديال هاد الوحدة كيشمل السرقات من داخل المنازل والسيارات، جرائم القتل وحالات اكتشاف الجتث.

التدخل السريع

هاذ الوحدة تابعة لوحدات الشرطة النظامية اللي كتعرفوها نتوما بزاف ب"سيمي" وهي مختصة بتأمين مباريات كرة القدم و كتفرق التظاهرات اللي بلا ترخيص بالإضافة الى حالات الشغب وتأمين الممرات اللي كيدوز منها الملك.

الصقور

هاذ الوحدة جد مهمة فجهاز الأمن الوطني لأنها مند انشائها حققات نتائج جد إيجابية، لأنها كتعتامد على دراجات نارية اللي كتمكنها من التواجد فجميع الأماكن اللي مكتقدرش سيارات الشرطة الولوج ليها بحال الدروبة المضيقين، القرب ديالهوم من المواطنين ساهم بشكل كبير فمكافحة جميع أنواع الجريمة.
فرقة الخيالة:
هاذ الوحدة كتلقاها فالشواطئ، وقدام القصور الملكية، وبعض المرات كيجيبوهوم لتأمين الأمن فبعض مباريات كرة القدم الدولية.

الحماية المقربة

هاذ الوحدة خاصة بحماية الشخصيات المهمة والوفود الأجنبية وبعض رجالات الدولة، عناصر هاذ الفرقة كيتم الإختيار ديالهوم بعناية ووفق شروط صارمة بالمعهد الملكي للشرطة (بحال البنية الجسمانية، الرماية الدقيقة...) للإلتحاق بمديرية الأمن الملكي اللي كتكلف بحماية تحركات الأسرة الملكية.

فرقة الأخلاق العامة

هاذ الوحدة تابعة للشرطة القضائية وهي مختصة فمكافحة أوكار الدعارة والقبض على المومسات بتهمة التحريض على الفساد، كما كتعالج قضايا الإغتصاب وهتك العرض.

فرقة الكلاب البوليسية

هاذ الوحدة متخصصة فالبحث عن المتفجّرات والطرود الملغومة والتدخلات المباشرة لتفريق المشاغبين وكشف الجثث في مناطق الزّلازل والفياضانات والكوارث الطبيعية، حيث الكلاب البوليسية عندها قدرة فتمييز الروائح اللي كتبقى عالقة بالهواء والجدران، كما كتشارك فتمشيط ملاعب كرة القدم بحثاً عل المتفجرات عند تنظيم المباريات الكبرى واحتواء الجمهور في حالة الشغب.

فرقة تفكيك المتفجرات

من بعد الأحداث الإرهابية اللي وقعات بالمغرب ف 2003، وأحداث حي الفرح ف2007، تكونان هاذ الوحدة المتخصصة فتفكيك المتفجرات، وكيقوم المعهد الملكي للشرطة بتكوين 15 فرد كل سنة.